වැඩියෙන්ම පාඩු ලබන රාජ්‍ය ආයතන
මේ වන විට රාජ්‍ය ආයතන 8 ක්‌ අක්‍රීයව ඇතැයි ද ඉන් හතරක්‌ ළඟදීම ඈවර කිරීමට (වසා දැමීමට) නියමිතව ඇතැයි ද ජාත්‍යන්තර මූල්‍ය සහයෝගීතාව පිළිබඳ ජ්‍යෙෂ්ඨ ඇමැති සහ මුදල් හා ක්‍රමසම්පාදන ඇමැති ආචාර්ය සරත් අමුණුගම මහතා පසුගියදා පාර්ලිමේන්තුවේදී ප්‍රකාශ කොට තිබිණි. ඒ එ.ජා.ප. කොළඹ දිස්‌ත්‍රික්‌ පාර්ලිමේන්තු මන්ත්‍රී රවි කරුණානායක මහතා වාචික පිළිතුරු අපේක්‍ෂාවෙන් ඉදිරිපත් කළ ප්‍රශ්නයකට පිළිතුරු දෙමිනි. වසා දැමීමට යන ආයතන හතරේ සමස්‌ත අලාභය රු. 1984500,000 ක්‌ (රු. එකසිය අනූඅට කෝටි හතළිස්‌ පන් ලක්‍ෂයක්‌) බවද පවසා තිබූ අමුණුගම ඇමැතිවරයා තවදුරටත් පවසා තිබුණේ පාඩු ලබන ආයතන හතරක්‌ වසා දමා සෙසු ආයතන හතර යළි පිහිටුවීමට තීරණය කර ඇති බවයි.
මේ අනුව වසා දැමීමට යන බවට ඇමැතිවරයා ප්‍රකාශ කොට තිබුණේ ජනතා පොහොර සමාගම, හිඟුරාන සීනි ආයතනය, ශ්‍රී ලංකා රබර් නිෂ්පාදන හා අපනයන සංස්‌ථාව සහ සීමාසහිත ලංකා ෆැබ්රික්‌ස්‌ යන ආයතන හතර බවට ද ඇමැතිවරයා හෙළි කර තිබිණි. නැවත පිහිටුවීමට නියමිත ආයතන වන්නේ කන්තලේ සීනි කර්මාන්ත ආයතනය, ලංකා සළුසල ආයතනය, සමුපකාර තොග වෙළෙඳ සංස්‌ථාව සහ රාජ්‍ය වාණිජ (සමුපකාර තොග වෙළෙඳ) සමාගම යන ආයතන හතරයි. මේ ආයතන හතරේ සමස්‌ත අලාභය රු. 1781671,000 ක්‌ (රු. එකසිය හැත්තෑ අට කෝටි දහසය ලක්‍ෂ හැත්තෑ එක්‌ දහසකි.) එම ආයතන වෙන් වෙන්ව ගත් කල මින් කන්තලේ සීනි කර්මාන්ත ආයතනයේ මුළු අලාභය රු. 9717,000 ක්‌ද, ලංකා සළුසල ආයතනයේ අලාභය රු. 834632,000 ක්‌ද. සමුපකාර තොග වෙළෙඳ සංස්‌ථාවේ අලාභය රු. 987724,000 ක්‌ සහ රාජ්‍ය වාණිජ (සමුපකාර තොග වෙළෙඳ) සමාගමේ මුළු අලාභය රු. 1,1196,000 ක්‌ද වේ. මේ අලාභ තත්ත්වයන්ගේ බර දැරීමට සිදුව ඇත්තේ මහජනතාවටය.
No comments:
Post a Comment